بريوش مالح بحشوة السبانخ والجبن لذييذ
السلام عليكم ورحمة الله تعالى وبركااته
ليوم تنقترح عليكم واحد البريوش تيجي زوييين و يليق لعشا ولا لكوتي مع كويس تاع اتاي خاصة فهاد البرد
بريوش مالح بحشوة السبانخ والجبن لذييذ
المقادير :
العجيين
كاس كبييير لبن تقريبا 1/4 لتر
2معالق كبار زيت زيتون
معلقة كبيرة زبدة
بيضة
معلقة خميرة الخبز
2معالق كبار سنيدة
م صغيرة خميرة كيماوية
م صغيرة ملح
م صغيرة ثوم بودرة ( اختيارية ممكن اضافة الزعتر)
دقيق حسب الخلييط
الحشوة
بصلة صغيرة مشلضة
رطة سبانخ مقطعة
فص ثوم
2 حصص فرماج مثلث
معلقة كبييرة جبن(استعملت جبلي)
جبن محكوك مكانش عندي درت تاع السندويش
ملح/ابزار/رشة جوزة الطيب/ زيت
الطريقة :
العجيين اولا تندفيو اللبن شوية ونزيدو ليه 2 معالق سنييدة وخميرة الخبز و 3 معالق دقييق نخلطو كلشي ونخلييوه شي 15 دقيقة حتا تطلع شوية الخمييرة
عاد تنضيفو زيت الزيتوون وبيضة ودقيق ملح وخميرة الكيماوية وبودرة الثوم ونعجنوها
خاصها تكون مرخووفة شوية منين تدلك مزياان تنضيفو ديك معلقة الزبدة و ندخلوها فالعجين مزيان
راها تتولي تتلسق متزيدوش الدقيق حيت قدما كانت خفيييفة تتجي هشييييشة ونغطيو عليها نخليوها تخمر
فهاد الاثناء تنوجدو الحشوة
تنديرو شوية تاع الزيت فمقلات وننضيفو البصلة و ثوم حتا تدباال عاد تنزيدو السبانخ ورشيييييشة ملح(الجبن ماالح)
وابزار ورشيشة الكووزة حتا ينزلوو و ينشفو من الماء كنضيفو جبن مثلث و الجبن الطري ونحركو حتا ينساجمو مزياان ونطفيو نخليوه يبرد
بعدما خمر العجيين و بردات الحشوة تنوجدو شي طبيسيل فيه شوية الزييت و طاوة ندهنوها مزياان بزييت(رشيتها بدقيق حيت تتلصق)
ونعملو كويرات صغار من العجين بعدما نكونو دهنا ايدينا بالزيت( تتكون تتلصق) ونعمروها بشووية تاع الحشوة و طريف فرماج سندوييش
ونسدوها علا شكل كرة و نبداو نستفو فطاوة ديالناااا
منين تعمر نخليوها تخمر مزيااااان لانه قدما خمراات تتجي النتيجة مزياانة(بالنسبة ليا سخنت الفران شوية حتا دفا ودخلت الطاوة وخليتها شي نصف ساعة خمرات مزياان لي تسهيل الوقت)
هنا بعدما خمرااات ندهنوها بالبيض ونرشوها باش بغينا انا متتعجبنيش ريحة البيض وليت دهنتها خير بشوية اللبن مع معيييييلقة عسل ودخلتها طيب
الفرن علا درجة 200 تنخليها طيب علا خاطرها حتا تتحمر مزياان راها متتاخدش الوقت بزاااف
منين تطيب تنقلبوها فشبك باش تبرد ومتعجنش
وهنا من الداخل تتجي خفييفة ولذييذة
للاشارة هاد العجيين صالح حتا للحلو عوض الحشوة مالح ممكن نديرو مربى او شكلاط او... ونضيفو للعجين شي كيس فاني تيجي زويين
التعليقات على الموضوع