بيتزا بالطون و الكروفيت بعجينة بوشيار

السلام عليكم و رحمة الله 

اليوم جبتليكم بيتزا بعجين الشيار كاتجي رااااااائعة و خفيفة و من الداخل مجعبة غزااالة 

 المقادير  للعجين :
نصف زلافة دقيق الفورص
نصف زلافة فينو
م.ك زيت زيتون
معيلقة خميرة
ملح
و ماء دافي

الحشوة :
بصلة مشلضة او مقطعة شرائح
الفلفلة خضرا و حمرا مقطعين مربعات او شرائح
كروفيت مشحر فزويتة بلدية مع شويش ملح و ابزار
2 علب طون مصفيين من الزيت
صوص طوماط انا عملت لي كتكون واجدة
زيتون اسود مقطع الى حلقات
جبن الموتزريلا المبشور
صوص طوماط

الطريقة :

كنجمع مقادير العجين بالماء دافي و انا كندلك العجينة و انا كندلك خاصها تكون مرخووووفة فحال الشيار او السفنج , نغطيوها و نخليوها تخمر فمكان دافي .





في هاد الاثناء نوجدو الحشوة , ناخدو مقلاة نديرو فيها زويتة بلدية او مخلطة و نشحرو فيها البصلة + الفلفلة حمرا و خضرا + ملح و ابزار منين ينزلو ماشي يطيبو بزااااااف غير ينزلو شويش و صافي عليهم نزيدو لهم القليل من صوص طوماط غير تسخن نطفيو عليهم .

من بعد ما خمرات العجين ناخدوها و نبسطوها شويش من فوق سطح مرشوش بالفينو و نقلوها للاطة عاد نكملولها تكراصها بحرا ما تعدبكمش , المهم خاصها تكون رقيقة نتكوها الفورشيط ندهنوها بالصوص طوماط و ندخلوها الفران مسخن من قبل غير تشد راسها و نخرجوها كيفما موضح فالصورة 









منين نخرجوها ندردرو عليها الموتزاريلا و نديرو خليط البصلة و الفلفلة ثم الطون , الكروفيت , الزيتون الاسود , و لي تبقا لينا من الموتزاريلا و ندخلوها الفران .














نتمنى الوصفة تنال اعجابكم في امان الله و الى الملتقى ان شاء الله .
اللهم ادمها نعمة و احفظها من الزوال .