الروز باللحم والخضر

السلام عليكم

الروز باللحم والخضر

المقادير :


أولاً ندير الروز يتسلق نصف سلقة



نصفيه وندير عليه الماء بارد ونخليه يستقطر




نديره في الكسكاس يفور ويكمل طيابه


ندوز للمقادير الأخرى :


لحم مقطع مكعبات صغيرة
بصلة مقطعة مربعات + 3 فصوص توم محكوكين
حبة طماطم مقطعة مربعات
قسبر ومعكنوس مقطعين رقاق
لفت مقطعة مربعات صغيرة
جزر مقطع مربعات صغيرة
كرعة حمراء مقطعة مربعات صغيرة
جلبانة + لوبيا خضراء حبوب
نصف كأس زيت زيتون وزيت المائدة مخلطين

العطرية :

كمون - خرقوم - سكينجبير - تحميرة - إبزار - زعفران ملون - ملح حسب الذوق .

الطريقة :


ندير الزيت في الطنجرة ونضيف عليها البصلة والتومة ونخليها تتشحر حتى طيح البصلة

نضيف قطع اللحم والملحة على البصلة ونخليهم يتشحرو

ملي يتشحر اللحم نضيف عليه الطماطم والربيع ونسد على الطنجرة واحد 3 دقائق

نضيف العطرية ونخلط كلشي مزيان ونخليها واحد 3 دقائق أخرى على نار هادئة طبعاً

من بعد كنضيف كأس صغير ماء طايب ونخلي لحيمات يطيبو

ملي يقرب يطيب اللحم نضيف عليه الخضر ماعدا الكرعة الخضرة حيث هي دغيا كطيب

ملي تقرب الخضرة طيب نضيف عليها الكرعة ونخلي كلشي يطيب

ملي يطيب كل شي نخليها حتى تشرب الماء ديالها تماما 

نجيب طبق التقديم وندير فيه الروز بعد ما تفور وطاب 

ندير اللحم والخضرة فوق الروز 


ونخلط كلشي مزيان حتى يتخلط الروز مع الخضرة



ونقدمه بألف صحة

ملاحظة : ممكن ديرو الدجاج بدل اللحم وخصوصاً الدجاج البلدي كيجي لذيذ ، ملي تقدموه حيدو الدجاج من الخضرة وخلطو الروز مع الخضرة وديرو الدجاج من الفوق .