فطائر حلوة بعجينة سهلة و سريعة

فطائر حلوة بعجينة سهلة و سريعة

المقادير :

2كيسان دقيق فورص

2 بيضات

2 معالق كبار زبدة بحرارة المطبخ

2 معالق سنيدة

1 خنشة فاني

1 خنشة خميرة حلويات 7غ

4 معالق حليب ممكن تزيدي على حسب الدقيق الا كان تيشرب او البض صغير

سكر صقيل للتزين او عسل و الكوك

زيت للقلي

الطريقة :

تناخدو زلافة و نخلطو فيها الحليب و البيض و السكر و فاني بفورشيط مزيان

تناخدو الدقيق و نبسبسوه مع الزبدة تم تنضيف الخميرة تم الخليط ديال البيض و نجمعو ما تاحتجش للدليك ، الا شتي بان العجين شوية ناشف زيدي الحليب 

تنديرو جو كويرات و ممكن تديرهم في التلاجة واحد النصف ساعة 

انا شخصيا ما تنديرهمش على ما نوجد المدلاك و ندير الزيت يسخن تنطلق العجين مزيان يكون شوية رقيق ماشي غليض و نقطع بالجرار او بالمرشام و نبدا نشكل 

الأكترية تندير العقدة حيت دغيا تتوجد و ما تنضيعت العجين بزاف يلاه الجوانب فقط خلال ربع او تلت ساعة ها كولشي واجد

اما الا كان الوقت علاش الواحد ما يديرش اشكال اخري الصور توضح

هنا راني درت الشريط ديال العجين في قضيب الخشب نقصت منو على حسب الإناء الى غادي نطيب فيه بديت نلوي ما خاصش تزيري بزف العجين على القضيب و الا ما غاديش يبغي يتسل منين يطيبو وهما تيجو مقرمشين بزاف و رائعين غير خاص الطريقة اللوي تكون ما مزيراش من الأحسن نقسمو الفضيب على جوج باش نجربو اول مرة

هنا تقدرو ديرو اشكال لولادكم

هنا رشمت بالكاس و ضغطت على العجين شوية بالطوال و جمعت من الوسط على شكل بابيون

و بالصحة و الراحة