شوصون بالصوصيت سهل ولذيذ بصور
هاد الشوصون كيجيو خفاف حيت كيطيبو في الفران وروطب حيت فيهم خميرة العجين ولداااااااد حيت فيهم حشوة روعة كتشبه حشوة البيتزا
بالنسبة للعجين هادو هما المقادير اللي درت
250غرام دقيق
معلقة صغيرة ملح
معلقة صغيرة خميرة
معلقة كبيرة زيت زيتون
معلقة كبيرة فورماج محكوك
معلقة صغيرة حبق (إختياري)
بالنسبة للحشوة
فلفلة مقطعة مربعات
بصلة مشلضة
2 معالق كبار زيتون أسود
معلقة صغيرة إبزار
معلقة صغيرة كمون
معلقة صغيرة تحميرة
معلقة صغيرة ملح
رشة حبق
معلقة كبيرة فورماج محكوك
2معالق كبار زيت
معلقة كبيرة مطيشة الحك (مركز طماطم)
بيضة للدهن سمحوليا ماصورتهاش
250 غرام صوسيس
عجنت العجينة وخليتها ترتاح بينما وجدت الحشوة
قليت البصلة شوية
زدت عليها الفلفلة والملحة والعطرية
دوبت مطيشة الحك في شوية ما وزدتها وخليت الحشوة حتى طابت الفلفلة
حيدت الجلدة للصوسيس وزدتو هو والحبق
سمحولي على الصور إلى كانو مضببين على حساب البخاراللي طالع هو اللي كيضبب الصور
منين طاب الصوسيس زدت الزيتون والفورماج خلطتهم وطفيت عليهم وخليت الحشوة تبرد شوية
على فكرة الريحة اللي طالعة ممممم كتحمق
رشيت شوية الطحين وطلقت العجينة قطعت دوائر ودهنت الجوانب بالبيضة اللي طربت
عمرت الدوائر كل وحدة بمعلقة كبيرة من الحشوة وسديتهم ضغطت عليهم بالفورشيطة باش مايتحلوش منين يطيبو ستفتهم في لاطة اللي غادي ندخلها للفران دهنتهم بالبيضة والصور كتوضح كلشي
خليتهم يخمرو نص ساعة هاهما منين خمرو عاودت دهنتهم بالبيض ودخلتهم للفران سخون على حرارة عالية 200درجة لمدة 30 دقيقة وأنا كنراقبهم كينين اللي طابو قبل وكاينين اللي من بعد
وهاهما منين طابو نتمنى يعجبوكم
وهادو عن قرب
التعليقات على الموضوع