شوربة شوفان و الخضر لذيذة وصحية

السلام عليكم و رحمة الله

كيف دايرين أنيقاتي

ان شاء الله تكونوا بخير و على خير

جبت ليكم اليوم واحد الشوربة ديال الشوفان و الخضر لديدة و بطبيعة الحال صحية

نبداو على بركة الله

نحتاجو اولا لمرق الدجاج. (لتر و نصف)

خضر حسب الرغبة مقطعة مكعبات صغيرة

بالنسبة ليا كان عندي الجزر الجلبانة فلفلة خضراء و صفراء ڭرعة خضراء و شوية ديال السبانخ

تحضير مرق الدجاج

خديت صدر ديال دجاجة بالعظام و درت عليه الماء لفتة و حدة مقسومة على زوج جزرة وحدة و طريف ديال البصلة ملح إبزار و شوية ديال الزعتر و 3 الريوس ديال الثوم.

فاش طاب السدر خديته درت بيه الكروكيط و المرق احتافظت بيه

خليتو على النار و زت عليه حبة ديال مطيشة و خليتها حتى طابت و طحنت كل شي 

رديتها على النار و رميت الجزر هو الاول لانه غادي يهز شويه الطياب

من بعد واحد 15 دقيقة رميت باقي الخضار نخليها حتي طيب و في الاخير نضيف الشوفان و نحرك

بمجرد ما تبدا تتقال نحبس 

الشوربة تتولي خاترة و كريمية بفضل الشوفان

قدموها بالصحة و الراحة

نخليكم مع الصور للتوضيح